WOW-skoolmediakursus

Ons mediawêreld verander daagliks en daarom brei ons kursus ook uit om by die veranderende tegnologiese landskap by te hou. Wat voorheen ’n tradisionele skoolkoerantkursus was met die klem op gedrukte of afgerolde skoolkoerante wat in koerantstyl uitgelê is, is dit aangepas tot ’n meer algemene skoolmediakursus sodat sosiale en digitale media en die gebruik van selfone ook bespreek word.

Die projek is gerig op skole en leerders wat meestal beperkte hulpbronne het (veral wat betref rekenaar- en slimfoontoegang, data, internetverbinding en kontantvloei). In baie gevalle het die betrokke skole nog nooit enige vorm van skoolmedia gehad nie en het die leerders ook nie tuis toegang tot media, internet of tegnologie nie – of dalk net beperkte toegang. Sommige skole was egter al voorheen deel van die projek en het goeie skoolkoerante en stories vir die kompetisie ingeskryf. Ons kan almal by mekaar leer.

Ons wil leerders en skole probeer inspireer en motiveer om hul stories te vertel, te dink oor hul omgewings, opgewonde te raak oor moontlikhede en geleenthede, oplossings te vind en ’n spieël vir hul gemeenskappe te wees – al is daar beperkte hulpbronne en swaarkry. Tot die mate waartoe dit prakties moontlik is, sal leerders en onderwysers wat by die skoolmediaprojek betrokke is, basiese leiding kry met hul stories, foto’s, video’s, digitale media en nuusbriewe. Die idee is om dan ten beste daarmee te kommunikeer onder die skool se spesifieke omstandighede, ’n kreatiewe uitlaatklep te ontgin en hopelik vreugde en ’n gevoel van samehorigheid te ervaar oor wat skole en leerders al bereik het. 

Ons hoop dit sal wêrelde open en verander en boonop word belangrike kommunikasie- en taalvaardighede ook aangeleer.